Lebonna dan Paerengan versi Bahasa Toraja

Lan misa’ tondok den ade’ misa’ anak dara, Lebonna tungka sanganna, Bakkun Balusu’ pa’gantiananna. Ia tinde Lebonna, to laen-laen dadinna, senga’ kombong garaganna. Belanna iatu tampa rapa’na, pa’kalean diarru’na mepatobang penaa kedenni tau nasitamparan mata. Ondonganna tu pessiparanna tae’ sanglindo susinna. Iamoto anna mendadi pa’tuladanan lako mintu’ sangtondokna.

Lan tu tondok nanii torro Lebonna, den da’dua muane ganta’. Misa’ disanga Dodeng, na iatu misa’ disanga Paerengan diganti duka Massudilalong sia Palalunan. Ia te muane da’dua pada morai umparorong rampanan kapa’ lako Lebonna, naurunganni massengo tu Lebonna nakua:

“Kendek dua inde londong, sibarrung inde muane,

umbamo laku laenan, la kukanan kairian,

pada talu’tukna rara’, pada bombongna bulawan.”

Iatu dolo umparampo mali’na lako Lebonna iamora tu Dodeng. Apa iatu pa’inaanna Dodeng tanggan natarima melo Lebonna, pa tae’ napapayanni lako Dodeng sangadinna napasande’ lako to matuanna. Iamoto anna ma’kada nakua:

“Mara’nami inde londong, soyangna inde muane,

sanda’-sanda’pa mebali, pangkunpa’ ma’kada misa,

matakuna’ magiangna’, lako tomendadiangku.”

Naparompomi Dodeng lako tomatuanna tu kadanna Lebonna naurunganni umpake’de’ pangngan tu tomatuanna Dodeng lako to matuanna Lebonna. Apa sae lako ma’tallungbongi tae’nadibungka’ len te pangngan, battuananna tae’ anna ditarima. Randuk dukami tu Dodeng madiong ba’teng.

Tonna issanni Paerengan kumua tae’ naditarima tu Dodeng, umpake’de’ dukami pangngan diomai banuanna to matuanna lako to katuanna Lebonna. Tonna kutanai tomatuanna tu Lebonna diona te pangnganna Paerengan, natimangmi petaa mammi’ anna ma’kada situru’ sallo’ inaanna, nakua: “Io, iyamo bayu sielle’ku, iamo samban sangkalamma’ku.”

Belanna malangngo’mo penaanna tu Lebonna, dibungka’mi tu pangngan anna siissanni tau kumua ditarimamo tu Paerengan. Dipatamami alukna rampanan kapa’, anna dipasumurruk te to sangayoka tedong tama tananan dapo’. Dilampakmi tu kapa’ unnangkaran tana’ bassi, battuananna minda tu ma’lalan sala napobannangngi songka tananan dapo’, iamo laumbaya’ pa’annanan ayokana tedong (sangpulodua tedong).

Tonna manda’mo lan tananan dapo’ narande kamarampasan, unggaragami dandi matoto’ tu Paerengan sola Lebonna kumua la pada tuo la pada mate, kumua:

“Mateki’ la pada mate, mateki’ tang la sisarak,

sio’tonan batang rabuk,

ulli’-ulli’ sola duka, borro sito’doan duka.”

Lan katuanna sola duai tae’ nabela sipakundunan kada. Marampa’ lan banuanna, malute lako padanna tau sia mabassa anna sa’bara’.

Apa den ia misa’ tau tu tang matana penaanna untiroi tu katuanna Paerengan sola Lebonna, iamotu Dodeng. Inang madiong ba’tangmo tonna tae’ natarimai Lebonna. Ondong pissan tonna ditarimamo tu Paerengan, randukmi natambukan essun tu Lebonna sola Paerengan. Lamoraimi undakaranni lanaposanggangna te to sangsamban karambau.

Den todami pissan anna ditarii te tondok nanii torro Paerengan. Unggaragami kada malepong bingka’ lan kombongan kalua’ tu mintu’ pa’tondokan la male umpangeai tondok. Iatonna ke’de’mo tu tau, dolomi tu Paerengan umpabatta’ penaanna solana. Apa iatu Dodeng naangga’i ma’undi-undi. Denmo parannunna penanna nasangan inang lamate mo tu Paerengan belanna iamo dolo dio tingayo. Na iake matemi tu Paerengan anna balumo tu Lebonna, tantu moraimo Lebonna umpomuanei. Iatonna marassan tau sirari, tikarami sule dolo tu Dodeng anna parampoanni Lebonna kumua matemo tu Paerengan lan kasirarian. Mangkato male bangsiami tu Dodeng memboko’. Iatonna malemo tu Dodeng, unnurukmi tumangi’ tu Lebonna lendu’ masussanna nasa’ding. Nakilalaimi tu dandinna sola Paerengan kumua:

“Mateki’ la pada mate, mateki’ tang la sisarak,

sio’tonan batang rabuk,

ulli’-ulli’ sola duka, borro sito’doan duka.”

Pakalan mentuyomi tu Lebonna anna mate.

Tae’ namasai alla’na rampomi tu Paerengan sule lako banuanna. Uai mata nalambi’ belanna ka’tumo angin dipudukna, ronta’mo bannang penaanna tu Lebonna. Tirambanmi Paerengan, li’pangmi bali tedongna, tigega’mi pa’tondokan, siurrukan tau kamban. Makarorronmi pangleon, dossomi ampunna lembang, male natampe Lebonna, naboko’imo malolle’.

Ia tu Paerengan, tae’ naissanni apara buntu tumangna naurunganni ma’lalan mate tu Lebonna. Dialukmi tu Lebonna situru’ ada’na rampe matampu’. Mangkato namane male dipeliang.

Dio la’pek batu tu nanii liangna Lebonna tuo buda induk tu biasa dirambi la diba’tai. Ia tonna lambi’mi kandean bo’bo’na Lebonna, rimbakan pote bolongna Bakkun Balusu, malemi tu Dodeng mangrambi lako to’ se’pon liangna Lebonna. Ia tonna marassan mangrambi, tiallingmi tama talinga duanna, tilantunk tama suling patomalinna tu gamara makalaen-laen nakua:
“Dodeng mangrambi ma’dedek, Dodeng ma’patuang-tuang.

Rampananpi pededekmu, annapi pepamaru’mu.

Ammu perangipa’ mati’, ammu tanding talingapa’.

Parampoanpa’ dikka’ kadangku, pepasan mase-maseku.

Lako ambe’ Paerengan, muane sangkalamma’ku.

Nakua duka lasangmante’kan, lasango’tokan penaakan,

lasangbuku-buku rundun, lasangbosian beluak.

Angku dolo aku mante’, angku ma’paliu aku,

kariuanmo lalanku, taruk ganda suleanku, tae’sia lamante’na, lasisarak penawanna,

umbami buanna dandi, to kada pura diboko’.” –> Download lagunya indete

Tonna mangkamo Dodeng urrangngi te gamara susito, mengkalaomi daomai loloki mayangna anna tarru’ lako banuanna Paerengan umparampoi tu pepasanna Lebonna. Li’pang mi tu paerengan urrangi sia nakilalaimo sule tu dandinna sola Lebonna. Nakuami lako Dodeng:

“Tambaina’ ke lamale pole’ko mangrambi.”

Natambaimi Dodeng tu Paerengan tonna la maleomo mangrambi anna male sola lako to’liang. Tonna marassanmo tu Dodeng mangrambi, narangimi sola duai tu pepasan susi bangsia to mangkanna narangi Dodeng. Tirambanmi Paerengan li’pangmi datu muane urrangi tu kadanna Lebonna, baine sangkalamma’na. Ma’kadami tu Paerengan nakua:

“Mangnga malingna’ urrangi, leagana’ umpealling

gamara ma’mallo-mallo, to sa’da ma’rio-rio,

kada tingan ia tondo’, bisara tang tongandika,

kampaimi Paerengan, tayanmi bali datummu,

anna ganna’i dandinta, to kada mangka diulang.”

Sulemi tu Paerengan lako banuanna anna ma’pasakka’ susi to la male mambela. Mesuami umpasakka’i tu kande nasangan mammi’ anna kandei. Mangka to ma’pakemi sanda parea, na male ussakei tedong bongana. Napopa’dondoi tu tedongna lako tondon aa’ milan natobang sola tedongna rokko aa’ na mate.

Tonna sisarakmo tu angin napariba’tang tu Paerengan, rirambanmi mintu’ pa’tondokan anna silele ma’kada kumua:

“Matemo tanduk kila’ta, songkamo lamba’ paonganan,

tibambang unnuyak langi’, songka ullalla’ batara.”

Dialukmi tu Paerengan situru’ ada’na rampe matampu’ anna dipeliang tama misa’ liang senga’ tu toyang dio mai liangna Lebonna. Tonna mangkamo dipeliang, tiramban tikuomi tu pa’tondokan untiro ulli’ ma’balole’-lole’ dio mai liangna Lebonna lako liangna Paerengan, ten dukato dio mai liangna Paerengan lako liangna Lebonna. Nakala’ tikumi kamatakuran tu mintu’ to matua-tua lan tondok, belanda tae’pa ia sanglindo susinna to allo pura diboko’, sia tae’ duka tu untandai kumua apara tu naposaba’ ke denni ulli’ mabalole’-lole’ susito. Sikutana-tanami tu tau nakua tae’ siaraka ia anna tang la nepokendekmo burana padang sia la napomangsanmo tallu lolona. Ma’kombonganmi tu mintu’ torroan ambe’ lan tondok sisola to parengnge’ la ussitangnga’i passabaranna te tanda kalle-kallean sia metakuran.

Attu iato ma’dioren duka tu Dodeng belanna pekamberan duka lan tondok. Iatoanna buda-budamo tau umpokada pangappa’ penaanna, ma’kada dukami tu Dodeng nakua: “Iake paissanku, tae’ senga’na tae’ laenan anna ma’balole’-lole’ tu ulli’ sangadinna belanna den dandinna tu Paerengan sola Lebonna la sangtuo la sangmate tonna tama rampanan kapa’.

Natule’mi Dodeng tu sengo ma’mallo-mallo tu narangi kalena dio to’liangna Lebonna. Mangkato, dira’ta’mi kumua ladipsisolamo tu batang rabukna Paerengan sola Lebonna. Tonna lambi’mi tu attu disipatui, sirampunmi tu tau anna dipalele tu batang rabukna Paerengan lako liangna Lebonna. Allo ia bangsiamoto anna radan tu ulli’ sisonda ma’balole’, belanna disundunnimo tu kasidandiann kumua: “Ulli’-ulli’ sola borro lasito’doan duka.”